خليل کوسو

خليل کوسو: اديب، عالم ۽ مزاحمتي شاعر خليل احمد ولد محمد اسماعيل کوسي جو جنم 10 آڪٽوبر 1967ع تي ڳوٺ حاجي علي محمد کوسي لڳ مسڻ ضلعي ٽنڊي الهيار ۾ ٿيو. قرآن پاڪ جي تعليم ڳوٺ قاضي نور محمد لغاري (دوآٻي قاسم حيدرآباد) ۾ حافظ محمد خان سومري وٽان حاصل ڪيائين ۽ پرائمري پنج درجا مسلم پرائمري اسڪول مسڻ ۾ پڙهيو، ان کان پوءِ مدرسة دارا الهديٰ مسڻ ۾ مشهور عالم دين مولانا عبدالڪريم لغاريءَ وٽان ’پهلي فارسي‘، ’ڪريما نامه حق‘، ’پندنامه‘، ’گلستان‘ ۽ ’بوستان‘ جا ڪتاب پڙهيو، بعد ۾ مدرسه دارالقرآن، قريشي محلي ٽنڊي غلام عليءَ نامياري عالم دين مولانا محمد اسماعيل پنهور وٽ عربيءَ جا شروعاتي ڪتاب پڙهيو. ان مدرسي ۾ مفتي محمد صادق سومرو (جنهاڻ) ۽ مولانا محمد عيسيٰ سمو سندس استاد رهيا. ڪجهه وقت مدرسه رياض العلوم (حيدرآباد ميرپورخاص روڊ) ۾ مولانا محمد علي پنهور (ميهڙ) وٽ به عربي ڪتاب پڙهيو، بعد ۾ مولوي فاضل عربي ۽ مئٽرڪ جو امتحان ڏنائين. 1995ع ۾ عربيءَ جو استاد مقرر ٿيو ۽ هن وقت هاءِ اسڪول شاديون ولهار ٽنڊي الهيار ۾ ملازمت ڪري رهيو آهي. شاعريءَ ۾ سندس استاد مولانا عبدالڪريم لغاري آهي ۽ شاعريءَ ۾ کيس سيد غلام قادر شاهه رضوي نصرپوري اوارڊ به ملي چڪو آهي. خليل احمد کوسي تاريخ ۽ تحقيق سان وڏي دلچسپي سندس ڪتاب ’ضلعي ٽنڊي الهيار جا تاريخي ماڳ مڪان‘ ضلعي حڪومت ڇپائي رهي آهي. ان کان سواءِ سندس تحقيقي ’سنڌ جا ٽنڊا‘، ’خيالات خليل‘ ۽ ’ولهار جو وتايو‘ ڇپائيءَ هيٺ آهي. سنڌي لئنگئيج اٿاٽيءَ جي انسائيڪلو پيڊيا اسڪيم لاءِ سنڌ جي ’ٽنڊن‘ جو مهيا ڪيل مواد هن جو آهي.

داخلا ۾ استعمال ٿيل تاريخون

1967.10.10  عيسوي

اديب، عالم ۽ مزاحمتي شاعر خليل احمد ولد محمد اسماعيل کوسي جو جنم 10 آڪٽوبر 1967ع تي ڳوٺ حاجي علي محمد کوسي لڳ مسڻ ضلعي ٽنڊي الهيار ۾ ٿيو.

شخصيتون - ڀاڱي جون ٻِيون داخلائون